„Сезона 2023/24“

Беласица оваа сезона започнува со тренерот Васе Беќаров, а од декември на чело на тимот застанува Александар Стојанов, кој дотогаш е координатор на младинските школи. Беласица на почетокот од сезоната се засилува со: З. Ивановски, К. Капсаров и Љ. Христовски од Брера, Т. Мичковски, Х. Бејков и Б. Картов од Кожуф, П. Иванов од швајцарски Криенс, В. Дујовски од Победа Прилеп... Беласица ја напуштаат: Амедов кој оди во Саса и Митовски кој оди во Осогово. Беласица ја стартува сезоната со два порази, од најквалитетните екипи во лигата, Пелистер и Беса. Потоа, Беласица влегува во серија од три победи, победувајќи го Башкими на гостински терен со 3:0. Беласица на крајот од есенскиот дел од оваа сезона завршува со 20 бодови и се пласира на 9-тото место, со 6 победи, 2 нерешени резултати и 7 порази, со гол-разлика 20:18. Најдобри есенски стрелци со по 3 гола се: капитенот А. Милушев, С. Сулев и А. Коцев. Ајдуците на 5 декември ќе го одбележат јубилејот, 35 години од нивното формирање. Во зимскиот преоден рок се прави голем ремонт во екипата. Долгогодишните стандардни првотимци З. Митевски и Ј. Серафимовски ги прекинуваат своите фудбалски кариери. Во екипата на Тиквеш заминува Д. Стојков, во екипата на Детонит од Радовиш заминуваат Т. Мичковски и З. Ивановски, во Кожуф преминуваат Б. Стојанов, Б. Картов и В. Коцев, а заминуваат и П. Иванов, В. Дујовски и Д. Радојчиќ. Во Беласица доаѓаат неколку млади и перспективни фудбалери, како што се: Д. Михолов од Брегалница од Штип, Н. Талески од Брера, П. Јакимов од Работнички, А. Абази од Гостивар, К. Јордановски, Б. Попоски... Беласица во вториот дел на првенството предводена од капитенот А. Милушев и искусниот С. Сулев и многуте млади фудбалери, предводени од тренерот Александар Стојанов, забележува 5 победи, 7 нерешени резултати и 3 порази. Беласица против шампионот Беса одигрува 1:1, со голот на Капсаров. Најубедлива победа забележува на гостувањето против Караорман со 0:4. На крајот, Беласица стигнува до 6 место, со освоени 42 бода, со гол-разлика 39:32. Втора сезона по ред, најдобар стрелец на тимот е левиот бек и капитен, А. Милушев со 7 гола, пред А. Коцев со 5 гола, кој го забележува и својот 100-ти првенствен настап во дресот на Беласица.