Сезона 1992/93

Во јуни 1992 година ФФМ донесува решение за формирање на државната Прва македонска фудбалска лига. Укинати се правилата за шутирање пенали по нерешен исход и за настап на тројца млади под 21 година. Летото 1992 си оди Т. Георгиев, а во подготовките се повредува и младиот голгетер В. Георгиев. Екипата е засилена со двајца искусни играчи: С. Гошев од Победа Валандово и Б. Шонтевски од Малеш. Летото пак владее беспарица и си одат Б. Истатов со А. Трајков и В. Дрвошанов. Пред почетокот на сезоната се наоѓа спонзор,за тренер е донесен Гоце Петровски, а помошник му е Илија Андреев. Првиот натпревар во независна Македонија Беласица го игра против Македонија во Ѓорче Петров и завршува 0:0. Првиот домашен натпревар го играат против Пелистер и Беласица победува со 2:0, со головите на П. Андреев во 75 и С. Гошев во 80 минута. Оваа полусезонасо своите голови се истакнуваат: Т. Ефтимов 9 и С. Гошев со 5 гола, а одма позади нив се капитенот П. Андреев со 3 гола и столбот на одбраната, Р. Панов, исто така со 3 гола. Во првиот тим, покрај овие 4 играчи,најчесто играат и: М. Илиев, Г. Стојановски, Н. Танушев, В. Костов, М. Даскаловски, С. Танев, Б. Шонтевски, а најчести алтернативи се: З. Трајковски, В. Митев, В. Велков и П. Ристевски. Во 12 коло, Беласица го дочекува Вардар и успеваат да одиграт 1:1, со голот на Р. Панов во 89 минута. Беласица завршува на 7 место со 19 бода. Во зимската пауза си оди Б. Шонтевски во Брегалница од Делчево, а В. Бојчевски оди во Тиверија. По залечувањето на повредата, се враќа В. Георгиев, кој постигнува 3 гола во пролетната полусезона. По 22 кола и победата над Саса од 1:0, Беласица избива на второто место, зад Вардар со 27 бода. Но, пак се појавуваат финансиски проблеми и по 25-тото коло си оди тренерот Г. Петровски, а на чело доаѓа Илија Андреев. Во последните кола, за првиот тим дебитираат: И. Ѓузелов и С. Петковски. Беласица на крајот завршува на 9-тото место со 34 бодови, со 12 победи, 10 нерешени резултати, 12 порази и гол-разлика 41:44. Прв стрелец на тимот е Т. Ефтимов со 10 гола, пред С. Гошев со 6 и П. Андреев со 5 гола. Младата екипа на Беласица го освојува купот на Македонија, со победа од 5:2 над Пелистер, со головите на: В. Георгиев, Т. Секулов, Т. Атанасов, Аљоков и Ристов.