„Сезона 1991/92“

Ова е последна сезона во која Беласица игра во рамките на првенствата на Југославија, организирани од ФСЈ. Беласица во есенскиот дел ја предводи Благој Митев. Како засилувања во Беласица доаѓаат двајцата најдобри стрелци на Тиверија, Д. Мавров и В. Велков, а од Кожуф доаѓа дефанзивецот Б. Оздоленовски. Од Беласица на отслужување на воениот рок заминуваат: Н. Танушев, С. Танев и З. Трајковски, И. Матеничаров заради сериозна повреда ја прекинува играчката кариера, а тимот го напушта и М. Алачки. По прогласувањето на независноста на Македонија, на 8 септември, се знае дека ова е последната сезона во југословенските лиги и делот со натпреварувачкиот карактер беше послаб. И оваа година Беласица е со слаби финансии, па многу нејзини играчи играат во други клубови. Во есенскиот дел Беласица забележува само 4 победи на 15 натпревари. Беласица најчесто игра во состав: Д. Руменовски, В. Митев, В. Бојчевски, М. Василев, М. Даскаловски, В. Костов-Манго, Т. Атанасов, П. Андреев, Р. Попов, В. Георгиев и Б. Марков. Со 7 гола, М. Василев е прв стрелец на тимот и оваа сезона е неговата последна полусезона во Беласица. Веднаш зад него се младиот напаѓач В. Георгиев со 5 и искусниот стрелец Р. Попов-Думбович со 4 гола. Во пролетниот дел доаѓа до тренерска смена и на чело на тимот пак доаѓа Б. Истатов, а негови помошници се: Р. Божинов, В. Дрвошанов и Ѓ. Ќучуков. Истатов ги враќа од Тиверија во Беласица искусните борци Р. Панов и Т. Георгиев, Г. Стојановски се враќа од Балкан од Скопје, од Брегалница Штип се враќа голманот М. Илиев, доаѓа и младиот напаѓач Т. Ефтимов, а од војска се враќаат: С. Танев и Н. Танушев. Голем хендикеп за екипата е неиграњето пролетта на М. Василев, си заминуваат и В. Костов, В. Бојчевски, В. Митев, а по првото пролетно коло, во тимот ги нема ниту Б. Марков и Д. Руменовски. Во вториот дел Беласица повторно игра слабо и забележува 5 победи на 14 натпревари. Вториот дел поминува во знакот на младиот голгетер В. Георгиев, син на легендата на Беласица, Ѓоко Георгиев. Искусниот Т. Георгиев игра во нападот и постигнува 4 гола. Над 20 натпревари оваа сезона одигруваат само: М. Даскаловски, П. Андреев и двете млади надежи, Т. Атанасов и В. Георгиев. Првенството не завршува, на едно коло пред крајот, клубовите од Македонија ја напуштаат лигата (јуни 1992) на повик од ФСМ. Беласица на 29 натпревари забележува 9 победи, 2 нерешени натпревариизгубени на пенали и 18 порази, со гол-разлика 35:65. Со тоа, Беласица завршува на 17-тото место, претпоследна во лигата.