„Сезона 1983/84“

На почетокот на сезоната, во Беласица доаѓаат: Д. Василев и М. Боев од Победа Валандово и Чича од Леотар од Требиње. Беласица ја напуштаат: Мафков, Стојков, Кусиванов, Ж. Василев кои одат во Тиверија, а Мишев и И. Андреев одат во Вардарски, додека Грнчаров оди во Металург од Скопје. Т. Георгиев е во ЈНА.

Беласица по првите 4 кола има три победи, а легендарна е победата од 2:4 против Галеника во Земун. Беласица игра и 1/16 на купот на Југославија против Динамо од Загреб и губи минимално. Тренерот Истатов има проштален натпревар во ноември, против Партизан од Белград. Зимата, З. Милосовски и Р. Панов одат во ЈНА. На полусезоната, Беласица се засилува со: Гугов од Дојранско Езеро, Павлов од Вардар и А. Сетинов од Металург. Беласица во пролетниот дел на трите натпревари против белградските екипи забележува две победи против Галеника и Рад и нерешен резултат со ОФК Белград. Од гостински терен се враќа со 4 нерешени натпревари против: Трепча, Напредак Крушевац, Тимок Заечар и Пелистер.

На крајот, Беласица завршува на 5-тото место, од 34 натпревари, забележува 12 победи, 10 нерешенирезултати, 12 порази, со гол разлика 42:43.

Ова е најуспешната сезона во историјата на Беласица, бидејќи со овој пласман меѓу првите пет во Втората лига - исток, се вбројува вкупно меѓу 30-те најдобри екипи во Југославија, а исто така и со пласманот во 1/16 на купот на Југославија.

Од 25 играчи што настапуваат во првенството, 16 играчи се од струмичкиот регион, што е показател за квалитетот на играчите, коишто потекнувале од овој наш регион.