„Сезона 1982/83“

Беласица на почетокот на сезоната стартува со високи амбиции, конечно да влезе во Втората југословенска лига - исток. Во тимот по една година пауза се враќа М. Георгиев, а се враќа и Н. Секулов, кој ќе се повреди на подготвителните натпревари и нема да одигра ниту еден првенствен натпревар. Никола Божиќ го предводи тимот до 10-тото коло, кога заради несогласувања со управата на Беласица, си оди. Тимот го презема Благој Истатов како главен тренер, а негов помошен тренер е Ристо Божинов. Беласица станува есенски шампиони во 1982 година, во Првата македонска лига. Беласица во есенскиот дел најчесто игра во состав: Б. Истатов (Д. Георгиев), Б. Младеновски (Ж. Василев), Т. Георгиев (В. Митев), В. Дрвошанов, К. Секулов, Р. Панов, А. Мишев (В. Стојков), М. Василев, М. Георгиев-Шеки (А. Пандев), Поповски (Љ. Мафков), Т. Стојанов. Зимата како засилувања доаѓаат: П. Андреев и Б. Митев од ЈНА, А. Грнчаров од Вардар, П. Блажевски и З. Милосовски од Куманово, И. Андреев од Бучим. Од тимот си одат: М. Шијаков и Б. Младеновски кои одат во Напредок од Пехчево, додека во Тиверија одат: Ж. Василев, Р. Клесов, Поповски и Ј. Георгиев. Во пролетниот дел Беласица носена на крилјата на П. Блажевски, кој дури на 8 натпревари ќе епрогласен за играч на натпреварот, убедливо ја освојува титулата. Во 25-тото коло пред 10.000 гледачи, Беласица го победува главниот конкурент, Куманово, со 1:0, со голот на Дрвошанов. Во последното коло, Беласица го совладува Вардарски со 3:0, а гостинските фудбалери, пред натпреварот, им честитаат на титулата на Беласица. Во пролетниот дел Беласица забележува 8 победи и 7 нерешенирезултати, без пораз. Први стрелци на тимот се В. Дрвошанов и М. Георгиев-Шеки со по 9 гола, пред З.Милосовски со 7 и П. Блажевски со 6 гола. Сите 30 натпревари ги одигрува само Р. Панов, а по 29 натпревари одигруваат В. Дрвошанов и К. Секулов.