„Сезона 1977/78“

Оваа сезона Беласица е предводена од познатиот тренерски тандем, Митко Џртев и Благој Ашиков. Претседател на управата е поранешниот легендарен играч на Беласица од педесеттите години на минатиот век, Александар Трендов. Беласица ја напушта младиот центархалф К. Секулов, кој оди во Победа од Прилеп, додека неговиот брат, М. Секулов, по 4 коло заминува во ЈНА, а во ЈНА заминува и М. Георгиев-Шеки. Засилување на тимот е десното крило В. Стојков, кој доаѓа од Кукла од Куклиш. Оваа сезона за првиот тим дебитира и младиот 17-годишен младински репрезентативец, Милан Василев. Василев дебитира во третото коло, кога тешко се повредува стандардниот првотимец, Илија Андреев. Во првиот натпревар пред домашните навивачи, В. Стојков со два гола го решава натпреварот и добива 10-ка од новинарите. Најдобри стрелци есента се: В. Стојков и Љ. Мафков со по 6 гола. Најубедливи победи се остварени против Охрид 6:1 и Караорман 4:0. Беласица најчесто игра во состав: Д. Георгиев, Р. Анчев (М. Кљанков), В. Стоилов (М. Митев), Т. Пецев, М. Василев (М. Филев), А. Мастев, В. Стојков, П. Андреев, Б. Тасев, Љ. Мафков и Т. Стојанов. Во пролетниот дел, Беласица е предводена од Ламбро Поп Димитров, а привремено тимот го води и Т. Ефтимов. Беласица се засилува со најдобриот стрелец на Тиверија, Томе Балдовалиев. Мафков против Транскоп од Битола постигнува хет-трик, а против Гостивар постигнува 4 гола. На крајот од првенството, Мафков со 16 гола е прв стрелец на тимот, пред Стојков со 10, Тасев со 6, Стојанов со 5 и Балдовалиев со 4 гола. Беласица завршува на крајот во втората половина на табелата. Оваа сезона Тиквеш е шампион на Првата македонска лига, а Кимов е најдобар стрелец. Традиционално, во август 1978 г. играт шампионот на лигата, Тиквеш, против остатокот од лигата, предводен од тренерот на второпласираната екипа во лигата. Тренерот на Пелистер во својата идеална екипа на првенството од другите17 клубови, повикува двајца играчи на Беласица, а тоа се Петар Андреев и Томе Стојанов.