„Сезона 1972/73“

Тренер на Беласица на почетокот е довчерашниот играч, 28-годишниот Ѓоко Георгиев, а помошен тренер е Милчо Ризов. Во летниот преоден рок од Беласица заминуваат: Р. Данев во Југококта од Ѓорче Петров, К. Костадинов и С. Вукшан во Тиверија, М. Ѓурчилов во Победа од Валандово, М. Морарцалиев во Победа од Прилеп, С. Грнчаров во Тетекс, а М. Џидалов и Ѓ. Георгиев ја завршуваат играчката кариера. Како засилување доаѓа Р. Анчев од Тиверија, а оваа сезона и талентираната млада генерација родени во 1954, 1955 и 1956 ќе дебитираат за првиот тим (Љ. Мафков, И. Андреев, В. Стоилов). Во 6 коло на местото на голманот Ј. Панчевски, влегува идниот голман на олимписката репрезентација на Југославија, Б. Георгиев. Капитен на тимот е В. Димитров, кој по 7 коло оди во ЈНА. Од 9 коло за тренер е именуван Славко Џорлев. Од 13 коло за Беласица започнува да настапува М. Чинков, кој се враќа од ЈНА, а станува и капитен на тимот. Беласица завршува на 11-тото место со 17 бода и гол-разлика 22:27. На полусезоната најдобар стрелец на екипата е Н. Секулов со 7 гола, пред В. Рингов со 4 гола и Шеки со 3 гола. Во зимската пауза Н. Секулов оди во Вардар од Скопје, а Д. Босиљанов се враќа од ЈНА. Славко Џорлев по 29-тото коло и нерешеното (1:1) со Рудар од Пробиштип, си дава самиот отказ, а на чело на тимот, пак се враќа Ѓ. Георгиев. Во 30-тото коло на гостувањето против Скопје, Беласица преку М. Секулов во 65 минута изедначува, а домаќините го напаѓаат судијата, по што потоа Беласица го добива овој натпревар со службени 0:3. Во последното коло Беласица го победува шампионот Работнички со 2:1, со головите на В. Рингов и Т. Аљоков. Оваа сезона поминува во знакот на идната ѕвезда на македонскиот фудбал, Васил Рингов, кој постигнува 15 гола и со тоа си обезбедува трансфер во Партизан од Белград. Младиот напаѓач Љ. Мафков со 5 гола навестува дека ќе е следниот голгетер на тимот, кој вкупно со 115 гола во дресот на Беласица ќе е најдобар стрелец на сите времиња. Беласица завршува на 8 место со 34 бодови, со гол-разлика 48:52.