„Сезона 1968/69“

Тимот оваа сезона продолжува да го води Јордан Николов-Бокото. Од Беласица заминуваат: Ј. Петровиќ во Брегалница од Штип, Т. Семенков во Работнички, а во составот ги нема: И. Камиларов, С. Босиљанов и В. Дрвошанов. Благој Истатов по 7 коло заминува во Победа од Прилеп. Најголемо засилување на тимот е враќањето на центарфорот Ѓоко Георгиев од ЈНА, а кој последно играл за Работнички. Беласица започнува силовито и по 6 кола е прва со 11 бодови. На крајот од есенскиот дел, Беласица има 17 бодови, со 7 победи, 3 нерешени резултатии 5 порази. По заминувањето на Истатов, на голот пак се враќа, К. Костадинов, а во одбраната се: Ќучуков, Димитров, Шумаров, Трајков и Зографски. Во нападот најефикасни се: Џидалов со 7 гола, пред Пантазиев со 5 и Георгиев со 4 гола. Во зимската пауза се враќаат: Т. Семенков и В. Дрвошанов, од 24 коло почнува да игра и Р. Котев, а шанса им се дава и на млади играчи, како што се: П. Бинев, голманот Ѓ. Димитриев, М. Секулов, Р. Анчев, Ѓ. Митев и Табанов. Во составот ги нема А. Малинов кој оди во ЈНА и Т. Шумаров. Беласица игра променливо, од убедливи победи против Караорман (5:0), Питу Гули (7:2), Маврово (4:0) и Кожуф(4:1), па до немоќ на туѓ терен, каде од 8 натпревари, забележува само 1 нерешен натпревар против ФЦУ во Скопје. Котев во 7 натпревари постигнува 6 гола. Повеќе голови од него постигнуваат само: П. Пантазиев 13, М. Џидалов 11 и Б. Ашиков 7 гола. А. Трајков-Чанда ги одигрува сите 30 натпревари, како стартер.