„Сезона 1965/66“

По одличната голгетерска сезона, М. Џидалов преминува во силната екипа на Брегалница од Штип, а со него заминува и Б. Пандев. Сулејманов оди во Борец од Велес, а Томе Ефтимов ја презема тренерската позиција и ретко ќе игра. Во екипата на Беласица се враќа искусниот стрелец Р. Зафиров. Беласица е засилена и со: голманот В. Младенов, кој доаѓа од Војводина, Д. Иванов, кој се враќа од ЈНА, а од младинскиот состав, кој го освојува младинскиот куп е десното крило, М. Чинков. Во првиот натпревар од сезоната Беласица ја победува Пелагонија од Битола со 4:0, со по двата гола на искусните стрелци, С. Џорлев и Р. Зафиров. По само 2 одиграни натпревари, П. Пантазиев оди во ЈНА. Беласица во 7 коло го совладува и вториот прволигаш од Битола, екипата на Работник, со голот на К. Христов. С. Џорлев дава по два гола на натпреварите против Вардар од Неготино (4:1) и Тетекс (3:1). Во есенскиот дел, добро ќе одигра и младиот М. Чинков, кој постигнува 3 гола. Во првиот тим редовно настапуваат и Т. Семенков и Ј. Петровиќ. На крајот од есенскиот дел, Беласица е на 8 место со 12 бода од 13 натпревари и гол-разлика 19:18. Најдобри стрелци се: С. Џорлев со 7 гола и К. Христов со 5 гола. На тренерската позиција доаѓа искусниот стратег Чедо Хаџиски-Џингис. Во пролетниот дел за првиот тим дебитира уште еден младинец, А. Малинов-Пата. Беласица во вториот дел игра послабо и забележува само 5 победи на 13 натпревари. Во последниот натпревар од сезоната, Беласица го победува шампионот Работнички од Скопје со 3:0, со двата гола на С. Џорлев и со голот на Ј. Петровиќ. Со тоа Беласица се спасува од испаѓање, бидејќи Љуботен има полоша гол-разлика и испаѓа. Беласица на крајот завршува на 12-тото место со 10 победи, 2 нерешени резултати и 14 порази, со гол-разлика 32:36. Најдобри стрелци оваа сезона се: С. Џорлев со 10 гола, пред К. Христов со 6 и М. Чинков со 4 гола.