„Сезона 1985/86“

Во својата трета сезона во Втората југословенска лига – исток, Беласица влегува со можеби најсилниот состав што го имала во нејзината историја. Благој Истатов по долги преговори решава да продолжи да ја води Беласица. Во Беласица како засилување пристигаат многу квалитетни играчи. Доаѓа младиот голгетер, Н. Шабани од Вардар, од белградски Рад се враќа генијалниот П. Блажевски, искусниот голман, Љ. Димовски од Победа од Прилеп, М. Јовановски од Саса, Д. Јорданов од Осогово и Воротовиќ од Прва искра. Кариерата ја завршува В. Дрвошанов, М. Георгиев–Шеки оди во Тиверија, З. Милосовски оди во Брегалница (Штип), во есенскиот дел не игра М. Боев, а го нема ни голманот Д. Георгиев. Беласица го повторува најголемиот успех со освојувањето на купот на Македонија и игра во 1/16 на купот на Југославија против Риека на Кантрида, каде губи во финишот 4:1. Беласица започнува добро, па така во гости ќе е совладана Слобода од Ужице со двата гола на Б. Јовановски. Беласица во есенскиот дел на два пати постигнува по 5 гола на Градскиот стадион „Младост“ против Земун 5:1 и Брегалница од Штип 5:0. Беласица завршува со 16 бодови на 10 место. Најчесто Беласица игра во состав: Љ. Димовски на голот, на бековските позиции: М. Василев , Т. Георгиев и Т. Стојанов, во задната линија К. Секулов, Р. Панов и З. Зајков. На десното крило игра брзиот Битолчанец, Б. Јовановски, во средината неуморливите П. Андреев и П. Блажевски, на левото крило Г. Узунов, а во нападот се менуваат Н. Шабани и Д. Јорданов. Како замени ќе влегуваат и: М. Јовановски, Г. Стојменов, Б. Марков и Воротовиќ. Во пролетниот дел во составот се враќа М. Боев, а од Тиверија доаѓа В. Алтнов, а си оди Воротовиќ. Најубедлива победа е забележана против Ловќен од 7:0. Пролетниот дел минува во знакот на голгетерот Неџат Шабани, кој постигнува 8 гола, а вкупно 12 во сезоната, со што е прв стрелец на тимот пред Г. Узунов со 8 и Б. Јовановски со 6 гола. Најмногу настапи, по 33 забележуваат Р. Панов и М. Василев, пред П. Андреев и Б. Јовановски со 32 натпревари. На 34 натпревари, Беласица забележува 14 победи и 5 нерешенирезултати, со гол-разлика 50:48, 33 бода. Беласица е 13-та, а на првите две места се Раднички од Ниш и Рад од Белград.