„Сезона 1951“

Беласица оваа сезона ја отвара со одигрување пријателски натпревар против скопски Вардар, на 19.02.1951 година. Со овој натпревар официјално се пушта во употреба новиот стадион, а на првиот натпревар присуствуваат 6.000 гледачи. Беласица го губи натпреварот со 0:4, а играчи во составот се: А. Ушаков, Ѓ. Панов, Г. Иванов, С. Георгиев, Ѓ. Аџиташков, М. Трендов, Насков, И. Николов, В. Цветков, А. Трендов и И. Чулевски. Беласица во сезоната 1951 година се натпреварува во Титовелешката зона. Беласица игра одличен фудбал и своите противници ги совладува убедливо. Најубедлива епобедата од 13:1 против Локомотива од Гевгелија, а на овој натпревар младиот голгетер, В. Цветков, постигнува 6 гола, додека Чулевски постигнува 3 гола. Покрај Беласица, во оваа лига се натпреварува и екипата на Работник од Струмица. Беласица станува есенски првак и забележува 7 победи и по 1 пораз и 1 нерешен резултат.

Во пролетниот дел нема да играат Локомотива од Гевгелија и Задругар од Ваташа. Беласица игра уште подобро и забележува само еден нерешен резултат против главниот ривал, Железничар од Титов Велес. По освојувањето на првото место во оваа зона, Беласица игра квалификации за влез во Македонската лига. Во две групи од по 4 екипи биле поделени осум екипи. Беласица е во група со Металец од Скопје, Братство од Гостивар и Караорман. Беласица стартува добро со нерешен резултатпротив Караорман во Струга и победа против Братство во Гостивар. Но, потоа следува пораз на домашен терен од Металец. Во следните два домашни натпревари, Беласица забележува две убедливи победи против Караорман и Братство. Во последното коло Беласица губи во Скопје, но сепак завршува на второто место, кое воделово Македонската републиканска лига.