Благој Георгиев - Шкоро

Благој Георгиев - Шкоро, легендарен голман, кој остави траг во македонскиот, но и во југословенскиот и грчкиот фудбал.

Дебитира за Беласица во април 1972 година, на 17 годишна возраст, на средбата со Југококта (денешна Македонија - Ѓорче Петров) во Скопје.

За Беласица настапува две сезони и забележува 46 лигашки натпревари. Последниот натпревар за Беласица му е повторно против Југококта, но во Струмица, во јуни 1974 година.

Потоа летото 1974 година заедно со М. Георгиев - Шеки и П. Бинев преминуваат во силниот југословенски второлигаш, Тетекс од Тетово. Во Тетово останува 4 сезони. Во тој период со него во Тетекс играат и В. Рингов (1975-77) и Н. Секулов (1977-78). Во последната сезона 1977/78, Тетекс се бори до последните кола за освојување на првото место и влез во Првата југословенска лига. Во 1978 година преминува во Вардар. Во Вардар во првата сезона (1978/79) брани на 26 лигашки натпревари, па оди во ЈНА (1979/80). Во следните три сезони (1980-83) во Вардар во Прва југословенска лига брани на 72 лигашки натпревари, односно 98 лигашки натпревари вкупно. Во Вардар ќе игра со Струмичаните, В. Рингов и А. Грнчаров. Во 1983 преминува во Ираклис од Солун, каде следните 5 сезони ќе брани и неколку пати ќе биде прогласуван за најдобар голман во Грција. Ќе биде и Олимписки и младински репрезентативец на Југославија. Во летото 1988 година, постојат преговори за враќање во Беласица и да брани во единствена Втора југословенска лига, но нема да дојде до реализација.

По завршувањето на кариерата, еден период е и селектор во Јужна Америка.

Благој бил и тренер во младинските категории на Вардар. Заедно со Љупчо Димовски, како тренери, го освојуваат младинскиот куп на Македонија, во 2003 година.

Голема голманска кариера, која започнала во Беласица од Струмица.